ONS EN ONS LEIERS

Met die oog op Sondag se preek lees ek hierdie week 2 Samuel 23:1-7, Dawid se laaste woorde. Uit die aard van die saak moet ons verstaan dat die laaste woorde van Dawid lank na sy dood geskryf is. Waarskynlik in ‘n tyd toe hy reeds meer as ‘n ikoon geword het. In die oë van God en mens was daar nooit weer ‘n koning soos Dawid nie, en sou daar ook nooit weer een soos Dawid wees nie. Maar, kan mens die man wat ons in 1 en 2 Samuel leer ken, die grootste koning in die oë van God en mens noem?

Die prentjie wat Dawid se laaste woorde oor hom skets, is nie akkuraat nie of ten minste nie die volledige prentjie nie. Uit hierdie laaste woorde sal ‘n mens nooit raai dat dit die man is wat ‘n buite egtelike verhouding met Batseba gehad het en toe sy swanger raak haar man laat doodmaak het nie.

LEEF OP DIE BREUKLYN

God se koninkryk kom op aarde net soos in die hemel.

God se koninkryk kom waar God meer en meer beheer neem.

God se koninkryk kom waar God se teenwoordigheid beleef word.

Ek en die kinders in die belydenisgroep van ons gemeente lees hierdie week Johannes 15. In die gedeelte oor die wingerdstok blyk die intimiteit wat Jesus verlang dat daar tussen Hom en sy volgelinge moet wees. In Die Boodskap staan daar dat ons ons moet “toewikkel in die liefde” van die Here Jesus. ‘n Ander manier om te sê wat ek bedoel met “Op die Breuklyn Lewe.”

Jesus is op soek na ‘n intieme verhouding met my.

NOU WAT DAN VAN DIE HEL?

Ek skryf hierdie post met versigtigheid. Om oor die hel te praat is omstrede.

Rob Bell het in 2011 Love Wins: A Book About Heaven, Hell, and the Fate of Every Person Who Ever Lived geskryf. Die boekie was topverkoper en een van die mees omstrede van die jaar.

Rob Bell is daarvan beskuldig dat hy Universalisme verkondig. Universalisme verkondig basies die boodskap dat alle mense gered sal word selfs mense soos Adolph Hitler en Osama Bib Laden. Na ‘n mens se dood het God dan al die tyd wat Hy nodig kan hê om deur sy liefde mense te oortuig sodat hulle die evangelie as die waarheid aanvaar.

Vir my is daar duidelike aanduidings in die Skrif dat daar wel ‘n hel is en dat sommige mense wel verlore gaan onmdat hulle nie in God geglo het nie.

NOU WAAR IS DIE HEMEL DAN?

Ek het so pas “Simply Jesus” van NT Wright gelees.

Wright het my aan die dink gesit oor ‘n hele paar dinge. Een daarvan is die hele kwessie oor die hemel. Hierdie gedagte van Wright kom in verskeie van sy boeke na vore:

“In the Bible, “heaven” and “earth” overlap and interlock, as the ancient Jews believed they did above all in the temple.” (p. 191)

Hemel is die plek waar God volkome in beheer is. “Heaven is the place from which the world is run.” (p 195) Ek kon nie anders as om te dink aan die manier waarop die evangelie volgens Markus Jesus se “intreepreek”  beskryf nie:

“Die koninkryk van God het naby gekom. Bekeer julle en glo die evangelie.” (Markus 1:15)

In sy boekie King Jesus Gospel skryf Scot McKnight dat die koninkryk in Jesus so naby gekom het dat as jy jou arm uitsteek kan jy dit dalk binne in die koninkryk insteek. In Jesus het hemel en aarde ge-“overlap” en ge-“interlock”.

MOENIE DIE “PAARTIE” MIS NIE

Ek lees Matteus 22, die gelykenis oor die bruilofsmaal waarheen die koning die mense nooi, maar elkeen op die gastelys het ‘n verskoning en vir een of ander rede kan hulle nie kom nie.

Op ‘n stadium raak die koning ongeduldig en stuur sy boodskappers om die mense na die bruilof te nooi wat aanvanklik nie op die gastelys was nie.

Ek lees toe in die week in Johannes 12:19 hoe kwaad die Fariseers raak omdat Jesus al hoe meer volgelinge trek. In die volgende vers vra Grieke, wat na dieselfde fees toe gekom het om te aanbid, vir een van die dissipels of hulle nie dalk met Jesus kan praat nie. 

Ek dink toe aan die gelykenis. Die Jode is die mense wat eintlik al eeue lank wag vir hierdie bruilof waarvan Jesus hier praat. Die bruilof wat Jesus na verwys het as die Koninkryk van God. Nou is die uitnodigings uit.

“DIE TRADISIONELE KERK SIEN MY NIE GOU WEER NIE”

Ek lees gister op twitter die opmerking: “Die tradisionele kerk sien my nie gou weer nie.” Ek het so ‘n klein bietjie agtergrond oor die persoon wat die opmerking maak, en ek vermoed dat sy rede het om te voel soos sy voel. Kom ons sê net mense wat aan “tradisionele kerke” behoort het gemaak dat sy so voel.

Ek is in die tradisionele kerk. Ek gaan in die tradisionele kerk bly.

Hierdie sal altyd vir my ‘n hartseer opmerking wees. Mense is nie die kerk nie. Die tradisionele kerk was hierdie jaar en sal weer in die jaar wat kom die slagoffer wees van onregverdigde, oneerlike en liefdelose sê-goed in die sosiale media. Die tradisionele kerk sal eerstens nie daar wees om haarself te verdedig nie omdat die meeste rolspelers in die tradisionele nie in die sosiale media funksioneer nie.

Maar ons wil onsself ook nie in die sosiale media verdedig nie.

MURE RONDOM ONS

Ons woon nogal in ‘n mooi omgewing. As ons in die oggend wakker word en ons trek die gordyne oop, dan sien ons ‘n klein stukkie berg. Die Kapenaars sou sê ons sien iets wat met ‘n koppie vergelyk kan word. Hoe dit ookal sy, vir ons is dit ‘n stukkie berg – die Magaliesberg.

Die strate is besonder boomryk en hier by ons maak die munisipaliteit die slaggate redelik getrou reg. Die meeste strate het sement sypaadjies en die mense stap graag met hulle honde of draf vir oefening. Ons voel as gesin baie veilig in Waverley. Die meeste mense wat in Waverley bly, bly al baie jare lank hier. As ek sê ‘n leeftyd dan bedoel ek 70-80 jaar en soms selfs langer. Mense is hier gebore en hulle gaan hier dood. Die meeste mense ken mekaar of weet ten minste van mekaar.

Maar so ‘n gemeenskap is ook ‘n moeilike gemeenskap om deel van te word. Vir ons was dit maklik toe ons in Augustus 2009 hier ingetrek het. Ons was immers die dominee en sy gesin en ons het in die pastorie ingetrek. Mense het ons opgesoek en ons verwelkom. Ek kom egter agter dat dit veral vir die jonger mense wat hier intrek moeiliker is. Die jonger mense met wie ek in aanraking kom sê nogal dat dit moeilik is. MURE RONDOM ONS.

As mense sukkel om deel te word van ‘n gemeenskap moet die kerk daarvan kennis neem.

GOD HET NIE ‘N BLOUDRUK-PLAN VIR JOU LEWE NIE

Op twitter volg ‘n sekere “easyleesie” my en ek volg hom. Hy is ‘n ateïs of ‘n skeptikus. Hoe hy na homself verwys is egter nie belangik nie. Vanoggend maak hy hierdie opmerking: “If God has a plan for me, what happened to my “free will”. You remember tha magic fruit and the talking snake…?”

Ek dink dit is ‘n billike vraag. Ek dink baie Christene skep die indruk dat God vir elke mens ‘n vooraf uitgewerkte plan vir jou lewe het en dat jou rol en taak is net om te ontdek wat God se wil en plan vir jou lewe is, daarby in te val en siedaar… jy is ‘n wonderlike gelukkige, suksesvolle wese. Ek dink nie dit is so eenvoudig nie. Kom ek stel dit so:

God het nie ‘n bloudruk-plan vir jou lewe nie!

God het ons geskep as mense met ‘n vrye wil.

CHRISTEN – MAAR NIE KERK TOE NIE

‘n Groep jongmense, onder 35, stuur vir ‘n paar vrae wat hulle gisteraand rondom die braaivleisvuur besig gehou het. Hulle vra of ek die vrae op die blog kan plaas sodat daar bietjie gesprek daaroor kan wees.

Daar is vyf vrae. Die vrae handel oor:

1. Hoe gaan dit wees wanneer die Here weer kom?

2. Wat het ‘n mens nodig om in die hemel te kom?

3. Wat van Christen wat in sonde lewe?

4. Wat behoort ‘n Christen se verhouding met die kerk te wees?

5. Mag ek kwaad wees vir die Here?

Elkeen van hierdie vyf vrae is op sy eie manier bietjie van ‘n toffie.

EK WIL NET GOD SE SPOOR SNY

Ek dink die laaste paar weke dikwels oor leierskap.

Ek hoop dit is algemene kennis dat iemand wat in die alledaagse lewe ‘n leier is nie noodwendig ‘n goeie leier in ‘n gemeente ook sal wees nie. Ek dink die teendeel is dikwels (nie in alle gevalle nie) waar.

‘n Leier in n gemeente moet tot n sekere mate ‘n aangename persoon wees. Mense moet met hom oor die weg kan kom en hy/sy moet dit vir hulle maklik maak om met hom/haar oor die weg te kom. John Maxwell reken “Leadership is influence. Nothing more. Nothing less.” ‘n Aangename persoonlikheid en die feit dat mense van jou hou gee natuurlik vir jou n basis omm van te werk om mense te beïnvloed.

Iemand met ‘n aangename persoonlikheid kan mense egter ook negatief beïnvloed. Leiers kan ook sulke aangename mense wees dat mense alte lekker in hulle gemkasones ontspan. Hoe meer tuis jy my in my gemaksone laat voel, hoe meer hou ek van jou. Ek vertrou op jou as my geestelike leier om seker te maak dat ek nie nodig het om my grense te skuif nie. Solank dit gebeur het jy my ondersteuning.

Steve Jobs was nogal van mening dat ‘n mens iets moet ontwikkel wat mense nie weet dat hulle nodig het nie.