GOD SE KERSKAARTJIE (3)

Ongeveer 900 jaar na God se tweede kerskaartjie (Gen 12:14 en 15) maak God weer ‘n belofte, hierdie keer gebruik die Here die profeet Natan om die kerskaartjie te skryf in ‘n belofte aan koning Dawid dat die Messias uit sy nageslag gebore sal word. Ons lees  die seënwens van die kerskaartjie in 2 Samuel 7:16-17.

“Wanneer jy te sterwe kom en jy by jou voorvaders rus, sal Ek een van jou nageslag, jou eie seun koning maak en aan hom ‘n bestendige koningskap gee. Hy sal vir my Naam ‘n huis bou, en Ek sal sy koningskap vir altyd laat voortbestaan. Ek sal vir hom ‘n Vader wees en hy sal vir My ‘n seun wees. As hy ontrou is, sal Ek mense gebruik om hom te straf, hom te kasty. Maar my trou sal Ek nie aan hom onttrek nie soos ek dit aan Saul onttrek het om vir jou plek te maak nie. Jou koningshuis en jou koningskap sal vir altyd vas staan; jou troon sal altyd voortbestaan.”

In hierdie verse is daar twee beloftes. Die eerste belofte gaan oor Dawid se seun Salomo wat die tempel sou bou wat Dawid graag wou bou. Die tweede belofte is dat die koningshuis van Dawid en sy koningskap vir altyd vas sal staan en vir altyd sal voortbestaan.

En so het die Joodse volk gewag op die Messias wat uit die nageslag van Dawid gebore sou word en die skrywers van die Nuwe Testament het op verskillende plekke die koms van die Here Jesus gesien as die vervulling van daardie belofte aan Dawid. Bv. in Lukas 1:32-33 word dieselfde taal gebruik:

“Hy sal groot wees en die Seun  van die Allerhoogste genoem word. Die Here God sal Hom die troon van sy voorvader Dawid gee, en Hy sal as koning oor die nageslag van Jakob heers tot in ewigheid. Aan sy koningskap sal daar geen einde wees nie.”

En vandag is ons as gelowiges die nageslag van Jakob wat leef onder die heerskappy van die Koning van die konings, Jesus Christus gebore in Betlehem wie se geboorte ons elke jaar met Kersfees vier.

God se kerskaartjie…

Sing saam: Hy is die Koning van konings, Hy is die Here oor almal…