GESEËNDE PAASFEES

Dit was twee dae voor Paasfees. Jesus en sy geselskap was in Betanië in die huis van Simon die melaatse aan tafel. In die Ou  Nabye Ooste het mense nie aan tafel gesit nie, hulle het op hulle linker sy by die tafel gelê, sodat hulle met die regterhand kon eet.  Enige iemand wat na iemand aan  tafel aangestap kom sou heelwat hoër as die persoon wees.

Op hierdie dag het daar ‘n vrou na Jesus toe aangestap gekom. In haar hande was ‘n glasfles met baie duur nardusolie. Die waarde van die olie was 300 silwer muntstukke – ongeveer ‘n jaar se salaris vir ‘n werkende man.

Die vrou het die glasfles met die baie duur nardusolie gebreek en die inhoud daarvan op Jesus se kop uitgegooi. In daardie tyd was die gebruik om ‘n paar druppels lekkerruik olie op ‘n gas te drup wanneer hy by die huis inkom of wanneer die gas aansit om te eet. Hierdie vrou het egter nie net ‘n paar druppels van hierdie baie duur nardusolie op Jesus uitgegooi nie, sy het die albastefles gebreek, met ander woorde, sy was nie van plan om die albastefles weer te gebruik nie. Sy het die hele fles op Jesus se kop uitgegooi.

Hierdie optrede van die vrou het hewige kritiek uitgelok van sommige mense in die vertrek. Hulle het dit gesien as die vermorsing van geld wat eerder gebruik kon word om iets vir armes te doen.

Jesus het dit anders verstaan. Niemand sal weet of die vrou dit so verstaan het nie. Wat ons wel weet is dat dit nie meer ‘n onbekende feit was dat Jesus verwag het om doodgemaak te word nie. Volgens die gebruike van daardie tyd het hulle iemand wat dood is gebad en daarna is die persoon met olie ingesmeer (gesalf). Daarna is die fles gebreek en die res van die olie saam met die liggaam in die graf geplaas. Jesus verstaan dat hierdie vrou Hom vooruit vir sy begrafnis gesalf het.

Wat my vanoggend tref is hoe Jesus haar daad beskryf. Vir Jesus was dit “‘n goeie daad”.

In die Grieks is daar twee woorde wat met goed vertaal kan word. Die een is agathos en die ander is kalos. Agathos beskryf die moreel goeie. Die moreel goeie ding is dikwels ‘n goeie ding, maar daar is ook iets hards en onaantreklik daarin. Wanneer iemand iets agathos aan jou gedoen het, dan het jy daardie ongemaklike gevoel wat maak dat jy wens die persoon het dit liewers nie aan jou of vir jou gedoen nie. Agathos  skep by mens die indruk dat die persoon hierdie goeie ding doen in die hoop dat hy op een of ander manier iets gaan terugkry. Plig – nie hart nie. Moet – nie liefde nie.

Die tweede woord is kalos.  Jesus gebruik hierdie woord om te beskryf wat die vrou gedoen het. Iemand wat iets kalos doen, bring ‘n glimlag op jou gesig. Ons Afrikaanse mense sou sê: “Dit was iets moois wat jy gedoen het.” Hierdie vrou het iets moois aan Jesus gedoen. Liefde het dikwels ‘n “extravagant” element. Iets van: “Dit was nie nodig nie.” Agathos is ook goed, maar mens kry die indruk dat daar darem ten minste aan die minimum vereistes voldoen is. Kalos-liefde ken geen grense nie.

Ons het ‘n lied wat ons van tyd tot tyd in ons gemeente sing. Die woorde begin so: “There are no words to tell You how I love You” Kalos teenoor Jesus is liefde wat nie meer met woorde gesê kan word nie.

Hierdie Paasfees sal Jesus nie by ons wees nie. Ons sal nie iets goed vir Jesus kan doen nie, maar aan die ander kant het Hy gesê dat in so verre as wat ons dit aan een van hulle gedoen het, het ons dit aan Hom gedoen. Dalk het jy die geleentheid om hierdie Paasfees iets goeds vir iemand anders te doen. Kan ek vra dat dit iets moois sal wees. Kan ek vra dat jy nie aan die minimum standaarde van iets goeds sal voldoen nie, maar dat jy ‘n klein bietjie oorboord sal gaan en iets moois sal doen.

Dink net aan die kalos ding wat Jesus deur sy sterwe aan die kruis vir elkeen van ons gedoen het.

Geseënde Paasfees en mag jou Paasfees vir iemand anders tot seën wees.

4 Kommentaar

Filed under Die Christelike Lewe

4 responses to “GESEËNDE PAASFEES

  1. Paasfees was altyd vir my so ‘n morbiede tyd, tot ek op ‘n dag besef het wat ‘n “mooi” ding Jesus vir ons gedoen het om te sterf, op te staan en die belangrikste op te vaar. As Hy by ons gebly het was ons mos tevrede, het dan mos nie iets gehad om na uit te sien nie. Nou leef ons met ‘n doel – ‘n strewe na eendag…

  2. Katrien

    Kalos….wat ‘n ongelooflike lieflike woord, dankie Attie

    Die vrou met die nardusolie se verhaal is vir my die heel mooiste getuienis van (menslike) liefde in die Bybel en ‘Kalos-liefde’ beskryf Jesus se liefde vir die mens perfek.

    Ek ervaar soms druppeltjies van hierdie ongelooflike onbeskryflike liefde wat my hele wese in lieflikheid hul, wanneer die kleutertjies onverwags opkyk en hulle ‘lief-wees vir my’ uit hulle ogies straal.

    Geseënde Paasfees vir julle ook.

  3. BB

    En vir jou en jou Geliefdes ook Ds – ‘n baie geseënde en mooi Paasfees!

  4. Geseënde Paasfees Attie, baie dankie vir jou koffietafel!

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out / Change )

Twitter picture

Jy lewer kommentaar met jou rekening by Twitter. Log Out / Change )

Facebook photo

Jy lewer kommentaar met jou rekening by Facebook. Log Out / Change )

Google+ photo

Jy lewer kommentaar met jou rekening by Google+. Log Out / Change )

Connecting to %s